Kabhi kabhi insaan sochta hai ke ab woh dobara kisi se mohabbat nahi karega. Dil itni baar toot chuka hota hai ke lagta hai ab kisi par bharosa karna namumkin hai. Lekin waqt guzarta hai aur phir achanak koi naya shakhs zindagi mein aa jata hai. Pehle sirf halka sa salam hota hai, phir roz ki baatein shuru ho jati hain. Dheere dheere uski muskurahat achi lagne lagti hai, uski fikr hone lagti hai aur phir ek din ehsaas hota hai ke dil dobara kisi ke naam ho chuka hai.
Mohabbat ki sab se ajeeb baat hi yeh hai ke yeh kabhi ijazat nahi leti. Yeh bas ho jati hai. Na waqt dekhti hai aur na hi insaan ki purani kahani. Dil har baar yeh umeed karta hai ke shayad is dafa sab kuch alag hoga.
Shayad is baar koi aisa mile jo sirf waaday na kare, balki unhein nibhaye bhi. Jo sirf khushiyon mein nahi, mushkil waqt mein bhi saath khara rahe.
Lekin har dafa kahani waisi nahi hoti jaisi hum sochte hain. Kuch log sirf chand dinon ke liye hamari zindagi mein aate hain. Woh humein hansa dete hain, humein sapne dikha dete hain aur phir bina kisi wajah ke chale jate hain.
Unke jane ke baad sab kuch wahi hota hai, lekin phir bhi sab kuch badal jata hai. Wohi phone hota hai, wohi kamra hota hai, wohi zindagi hoti hai, bas woh aik shakhs nahi hota jiske liye dil har roz intezar karta tha.
Lekin iska matlab yeh nahi ke mohabbat buri cheez hai. Ghalat insaan se mil jana aur baad mein dil toot jana, mohabbat ki ghalti nahi hoti. Ghalti sirf itni hoti hai ke hum kisi ko apni poori duniya bana lete hain, jab ke woh humein apni zindagi ka sirf ek hissa samajhta hai. Isi liye zaroori hai ke mohabbat ke sath sath insaan apni izzat aur apni pehchan ko bhi sambhal kar rakhe.
Asli mohabbat kabhi tumhein rulane ke liye nahi aati. Asli mohabbat tumhein sukoon deti hai. Woh tumhein yeh mehsoos karwati hai ke tum kisi ke liye ahmiyat rakhte ho. Woh tumhari baaton ko sirf sunti nahi, samajhti bhi hai.
Woh tumhari kamiyon ke bawajood tumhara saath nahi chhorti. Aur jab koi waqai tumse mohabbat karta hai, to uske actions uske alfaaz se zyada bolte hain.
Agar aaj tumhara dil toota hua hai to udaas mat ho. Har andheri raat ke baad subah zaroor aati hai. Ho sakta hai jis shakhs ke liye tum aansu baha rahe ho, woh tumhari kismat mein tha hi nahi.
Kabhi kabhi Allah kisi ko humse is liye door kar deta hai taake humein us shakhs se mila sake jo waqai hamari qadar karega. Is liye umeed ka daman kabhi mat chhorna.
Is liye muskurao, khud se mohabbat karo aur zindagi par bharosa rakho. Ho sakta hai tumhari sab se khoobsurat kahani abhi likhi hi na gayi ho. Aur jab woh sahi insaan tumhari zindagi mein aayega, tab tumhein ehsaas hoga ke har purana dard sirf tumhein us ek sachi mohabbat tak pohanchane ka zariya tha.
Click karo…
Click